في يوم وانا راجع من الشغل و بعد ما كتبت “الصمت” على التويتر و الفيس بوك
كانت ساعتها دي الفكرة المسيطرة على ذاتي كلياً
نزلت ركبت اتوبيس الهيئة الاتوبيس المفضل لى،،،رغم انه ساعات بيبقى زحمة و ان الميكروباصات موجودة
مالقتش مكان ابتسمت و وقفت و غمضت عيني ،،،محاولة للانفصال عن شلال الافكار المتعلقة بالشغل
و بعدين لاقيت مكان في اخر كنبة في الاتوبيس قعدت وسندت راسي و غمضت عيني تاني
الأول:”عارف انا يابني فعلاً كان نفسي اشتغل في حاجة من الاتنين الروبوت انجينيرينج او الجرين تكنولجي”
الثاني:”انا كمان كان نفسي بس نعمل ايه”
الاول:”انا كان نفسي اسافر بره و اكمل دراسة،،يابني احنا بنهري هنا..العالم كله متجه للبيوت الزيرو انيرجي و غيره و احنا بنخري هنا”
الثاني:”ماتكئبنيش يا ابني الله يكرمك”
…..فاصل من الكلام
الاول:”بص يا ابني الناس صنفين الاوال شخص مبدع جداً و ده ممكن تلاقى مهارته التعليمية بسيطة،،زيي مثلاً انا اه ممكن ابتكر حاجة صغيرة اوي او اكتر من حاجة ،،بس التطوير عليها ممكن ماكونش قد كده فيه
العلماء مثلا ممكن يكونوا من الصنف التانى اللى معظم اكتشفاته مبنىيه على نظريات مسبقة اصلاو بيكون الجانب الابداعي فيه قليل،،،،عشان كده انا شغال كويس في الحاجات اللى بتحتاج مشاركة مجتمعية لانها بتحتاج افكار بسيطة جديدة و مش بتحتاج دراسة علمية كتيره او مثلا افكار تسويقية بسيطة”
فاصل من الكلام (يدخل معاهم ثالث)…
الثالث:”على فكرة انا كمان مهندس انتاج و سامعكم من بدري و ساكت،،،انا يابني بقالى 30 سنة شغال موظف متبهدل…حاولت اقدم فكرة ابتكار من 25 سنة .. وانتوا عارفين الرد طبعاً…يا بيه احنا مش عارفين نصنع بلية في ماسورة صح عشان نطلع منظم،،،مش عارفين نظبط التوليرانس…حاجة تقرف”
وصلنا الحي العاشر ،،،نزلنا
كل واحد راح في سكة و فضلت متابع كل واحد فيهم بعيني مش عارف ليه
لحد ما جات واحدة قالتلى : “البا يا شيه”….ودي بقى
قصة طويلة ح اكتبها في نوت تانية
عارف ان القصة ممكن ماتكونش ممتعة او جذابه
او ممكن تقول لنفسك “وبعدين؟؟”
لكن يمكن وقع الكلام عليا هو اللى خليها كده
ولانك بتسمعها منى فعادي
انما انا كنت باسمعها من اتوبيس عام بعد كلام عن الاجرة و الزحمة
طب ليه انا استغربت
طب مانا باركب معاهم و انا في دماغى اللى فيها
مش عارف ايه شدني
بس يمكن ميكس الاحباط في التفاؤل
حاجات كتير تحبط
زي كلام الراجل التالت العجوز
و حاجات كتير تخليك تتفائل
زي ان الكلام ده يكون في اتوبيس عام
بمكن القصة دي ح تعجب كتير عشان كده
مش عارف …يمكن
تم كتابة هذه التدوينة بتاريخ 17/9/2012
مدونة غير مُعدّة للنشر 