في احدي الليالي المشبرة (فيه شبورة يعني) قررت وانا راجع من الموقع في تمام الساعة الثالثة و النصف بعد منتصف الليل اني اعدي علي البنك اعمل ايداع في الايه تي ام (ATM) بدل الشوارع الزحمة الصبح .. وقد كان
راودني شعور مقلق نظراً للحالة الأمنية التي تتعرض لها البلاد و لكن سرعان ما زال بمجرد تذكر ان يوجد حراسة من وزارة الداخلية علي كل فروع البنوك بالإضافة للحراسة الداخلية من إدارة البنك فاتجهت للفرع وبعد مادخلت ببص حواليا ..
مالقتش الا كرسي العسكري بس مكانش عليه العسكري .. كان عليه “قطه” (ايوه هيا يعني cat) ، بصيت ليها و ابتسمت وقلت “السلام عليكم” (بحاول اهون عليها مهنتها الشاقة)
فماردتش عليا مش عارف ليه مع ان السلام لله
عملت ايداع فعلاً وكنت عايز اصور القطه بس لاقيت الكاميرات محاوطاني وانا عارف كويس ان هي دي الحالة اللي بيشتغلوا فيها ، سألت نفسي طب ليه الكاميرا دي بدل متقلقني انا متقلقش العسكري اللي سايب مكانه او تكرم القطه .. #للكاميرات_استخدامات_اخرى
وهنا وقفت مع نفسي للحظة وقلت (بصوت حنين):
ليه انا مبقاش زي القطه دي؟ هي احسن مني في ايه؟ هل هي بتحب مصر اكتر مني؟ ليه منعملش زيها كلنا؟ ولا احنا شاطرين بس في التريقة ؟
لازم كلنا نحارب الارهاب لازم كلنا ندرك وضع مصر (لتحميل كلمات الشيخ الشعراوي عن مصر اضغط هنا) دلوقتي ، مصر بعد ٣٠ يونيو غير مصر قبل ٣٠ يونيو
ارجوكوا كفايه و يالا بينا نبني مصر
—————
مقتبس من كلمات الشيخ الشعراوي عن مصر
مدونة غير مُعدّة للنشر 